ធ្លាប់តែឃើញគេប្រើដាវកាប់ ឬទប់នឹងគ្រាប់កាំភ្លើងដែលគេបាញ់ នៅក្នុងខ្សែភាពយន្ត។ ប៉ុន្តែ ឥឡូវនេះ Daily Mail បង្ហាញនូវរឿងពិតទាក់ទងនឹងទេព្យកោសល្យដ៏អស្ចារ្យ របស់បុរសម្នាក់។
លោក Isao Machii គ្រូគុនដាវសាមូរ៉ៃ បានប្រើដាវកាត់គ្រាប់កាំភ្លើង (គ្រាប់ជ័រ) ដែលបាញ់សំដៅមករកលោកក្នុងល្បឿន ២០០ ម៉ាយ (៣២២ គីឡូម៉ែត្រ) ក្នុងមួយម៉ោង ក្នុងរយៈចម្ងាយជាង ២១ ម៉ែត្រ។
លោក Machii បានចាប់ផ្តើមហ្វឹកហ្វឺនជំនាញគុនដាវដែលមិនគួរឲ្យជឿនេះ តាំងពីលោកមានអាយុ ៥ ឆ្នាំម្ល៉េះ ហើយបច្ចុប្បន្ន លោកបានបញ្ចប់ការសិក្សានេះ និងធ្វើជាគ្រូគុនដាវនៅសាលាសាមូរ៉ៃ ផងដែរ។
ក្រុមអ្នកថតខ្សែភាពយន្ត បានធ្វើតេស្តសាកល្បងពីជំនាញមិនគួរឲ្យជឿនេះ។ សកម្មភាពទាំងអស់នេះ ទាមទារនូវល្បឿនលឿនដែលយើងស្ទើរតែមិនអាចមើលដោយភ្នែកផ្ទាល់។
ដើម្បីចាប់យករូបភាពដ៏អស្ចារ្យនេះ ក្រុមអ្នកថតខ្សែភាពយន្តបានប្រើប្រាស់កាមេរ៉ាទំនើបដែលមាន សមត្ថភាពចាប់យករូបភាពក្នុងល្បឿនលឿន ដើម្បីយកមកវិភាគជារូបភាពយឺតៗ។
